囍‧感謝 + 分享{扮靚篇}

最終我 refuse了 Catis，主要有早上與晚上兩位化妝師負責。

 

早上化妝師 – Miss S      7分

阿S化妝的技術本來不容置疑，但由於婚期剛巧遇上婚展，她不能跟我全日的妝，最初我覺得她既底好好，只要下午找另一個MUA 補妝轉造型都OK。不過當日她因為趕著走，幫我set完頭又沒有替我落 gel，結果我坐架開蓬花車到男家，個頭亂哂喇；晚上個mua 告知原來早上我沒有搽 mascara，所以對眼唔精。伴娘仲話番比我知，當日佢吹過我快D，覺得好唔respect我，當初我叫她7:00到又唔肯，結果7:35到達，最後未到9：30又趕住走。有些朋友跟我說我早上個妝有點老~ 我真係有d失望。

 

晚上化妝師 ─ Heidi @Cosmopolitan      9分

一個令我有很大驚喜的化妝師。最初找Heidi 試妝時，覺得她化得我對眼一致，眉亦不錯就 confirm 了。其實我覺得佢不太smart，set 頭沒有其他化妝師的精巧，做highlight、用什麼colour 都沒有主見，要提點她多次才做到，不像May Chan 的快手熟練，可以由得佢自由發揮都已經好靚。不過我想當初confirm 她已是九月中了，婚期迫近，很難再找別的好mua，而且我心中想要妝跟造型很簡單，只要跟足一點也沒有問題。

結婚當日，Heidi 先替我媽咪化妝，化完後，我覺得好恐怖呀，眉的顏色好實，Lip Gloss 又好深色，不過我又沒有時間幫媽咪執執，就到我要補妝喇，本來捻住婚禮前補妝很快呢。誰不知Heidi 替我落少少妝再化啊，她說我早上個妝熔了，如再補上去晚上個妝就好厚，結果，我6:00 行禮，5:45才化好啊。本來打算行禮前往酒店的花園拍攝，最後一幅也沒有拍過。

但當晚換晚轉造型，她就很快手，我跟她說只需一個好的妝，可以整晚不轉妝，只轉頭就夠了。結果我是一個妝撐足一個晚上，整晚都keep得好好，又省卻很多時間，髮型亦合了我的要求。當晚，很多朋友都說我個妝容很美，而且晚上的妝比早上的好得多，一點找不到我的倦意呢 (因為換著平日休息不夠的我，到了晚上就成了一隻熊貓了)。哈哈，Heidi 仲好年輕又靚女tim，兄弟們都說當咁多次兄弟，今次的化妝師最靚女喇 ^^

 

婚紗禮服 ─ 羅浮宮    10分

羅浮宮既婚紗真係好靚呀，好多拖尾又夠閃，不過晚裝就不是我杯茶，男禮選擇又不多。由落訂至還衫，service一直都好好。而且試衫空間好大好舒服，唔會有爭更衣室爭鏡的場面，證明佢地受 booking 安排得唔錯。

 

晚裝 ─ Noel Chu    9分

NC晚裝真係一流，人見人讚，試衫時揀靚衫真係有D頭痛o架。

Esdlife 上有人說NC service唔好，但我地一直都冇遇到唔好既待遇，serve 我地既sales 個個都好 nice，又成日同我地有說有笑。小小的鋪一到了weekend就好多好好多人試衫和落訂，其實我都唔明點解在同一時間可以接受咁多booking既，不過sales 安排準新娘試衫好快手，可以在同一時間有四個準新娘輪流穿起十多套晚裝，見到其他新娘穿得好看，就會忍不住自己也試試，試衫的兩三小時已經可以試二十套衫了，呢個場面只有NC先會出現。寶寶倒喜歡NC鋪小人多，感覺很親切得意呢。

評分方面，大家都了解我扣了一分的原因，就是價錢真的 … ，不過心想錢花多了可再賺回來，NC 晚裝確實靚得與眾不同，花錢給朱伯伯賺也是值得既。另外，佢地既頸飾又真係麻麻又舊，當初bargain 包的頸鍊根本用不著呢。

還有的是NC改的衫真係唔太o岩身。取衣時，竟然有兩件衫太窄要重改，當日仲有幾個jm 要等改衫。到了大日子，穿起兩件A-Line都是有點困難，姊妹們幫我上拉鍊時時又驚太大力整爛。

 

裙褂 ─ 錦發     10分

錦發的老闆娘真係好好人，雖然佢地成日海鮮價，我想做生意就係咁呢。落訂前試穿的褂真係有點殘舊，但繡起的圖案確是我和寶寶都好鍾意，所以就訂租了頭褂。但後來發現，原來很多人都在錦發訂頭褂，心想，那真的趕得切造好，還是根本不是件件都是頭褂? 不過到了十月初與翠兒去度身時，看到自己那件已造好的褂和玻璃櫃內很多新的褂，就知真係頭褂來的啊。當日穿起褂，很多親朋好友都讚套褂很新很靚呢 ^^

 

媽咪衫 ─ 麗新      9分

謝謝Yan的介紹，我媽咪同奶奶都是在元朗麗新租衫。她們都不想選擇九龍的店鋪，試衣取衫都不方便。不過屯門元朗其實好的店鋪不多，幸好麗新媽咪衫的款式不錯，唯我嫌有點不夠閃，但她們都好滿意。最重要是SERVICE好好，往多次店員的態度都好友菩，衫亦KEEP得幾新淨。

 

姊妹衫 ─ Elisa     7分

真係好彩有驚無險，大日子前一個多星期才取到衫，不過有些重改的、披肩又要在大日子前兩日先有得攞。其實我總算好彩，有一次我上去，竟然有個周六結婚的準新郎代替新娘上去追衣，當天已是星期四了。聽過很多靚太的遭遇，才知原來 Elisa 是跟婚期完工，不是早訂早造呢。成品方面不過不失啦。

 

結婚鞋 ─ 有利鞋店     10分

除了我的婚紗鞋，我的褂鞋、晚裝鞋、媽咪鞋同奶奶鞋全部都係蔡生買的，又平又靚又好著，舒服程度比起很多名牌的高跟鞋還要好。我晚宴的場地和更衣室都是有段很長的距離，當晚穿起對三寸半的晚裝鞋又企又走來走去都依然活動自如，唔刮腳，連酒店staff都以為我在穿上跑鞋呢。而且蔡生做數十元一對鞋的生意都有咁好態度，真係值得讚揚。

 

 

其他分享：
http://hk.myblog.yahoo.com/shirrie-river/article?mid=7267